काठमाडौँ,
रामचन्द्र पौडेलले रामनवमी पर्वका अवसरमा स्वदेश तथा विदेशमा रहेका सम्पूर्ण नेपालीमा सुख, शान्ति र समृद्धिको शुभकामना व्यक्त गर्नुभएको छ। उहाँले सांस्कृतिक तथा ऐतिहासिक पर्वहरूले विभिन्न जातजाति, भाषाभाषी, संस्कृति र भौगोलिक क्षेत्रका नेपालीबीच आपसी विश्वास, सद्भाव, सहिष्णुता र सहयोगको भावना मजबुत बनाउँदै राष्ट्रिय एकता सुदृढ गर्न सहयोग पुग्ने विश्वास व्यक्त गर्नुभएको छ।
शुभकामना सन्देशमा राष्ट्रपति पौडेलले यस्ता पर्वहरूले आपसी समझदारी, दिगो शान्ति तथा भाइचाराको भावना अभिवृद्धि गर्न प्रेरित गर्ने अपेक्षा गर्नुभएको छ। उहाँले परम्परागत चाडपर्वहरूको संरक्षण र प्रवर्द्धनमार्फत नेपाली समाजमा एकता र सद्भाव कायम रहने धारणा व्यक्त गर्नुभएको छ।
हरेक वर्ष चैत महिनाको शुक्ल पक्षको नवमी तिथिमा श्री रामचन्द्र को जन्मोत्सवका रूपमा रामनवमी पर्व मनाउने परम्परा रहिआएको छ। यस दिन भगवान् श्रीरामको विशेष पूजा–अर्चना, व्रत, अनुष्ठान तथा जप–तप गर्ने चलन छ। धार्मिक विश्वासअनुसार यसरी पूजा–आराधना गर्दा भगवत् कृपा प्राप्त भई मनोकामना पूरा हुने मान्यता रहेको छ।
राष्ट्रपति पौडेलले शताब्दीयौँदेखि चलिआएका यस्ता मौलिक पर्वहरूले नेपालको प्राचीन सभ्यता, धर्म र संस्कृतिको संरक्षणमा महत्वपूर्ण योगदान पुर्याउने उल्लेख गर्नुभएको छ। उहाँले रामनवमीलाई भगवान् रामको जन्मदिवस मात्र नभई अधर्ममाथि धर्मको विजयको प्रतीकका रूपमा समेत लिइने पर्व भएको बताउनुभएको छ।
यस अवसरमा देशका विभिन्न स्थानका मन्दिरहरूमा विशेष पूजा–आराधना हुने गर्दछ भने जनकपुर स्थित रामजानकी मन्दिरमा भव्य मेला लाग्ने गरेको छ।
