गण्डकी,
माध्यमिक शिक्षा परीक्षा (एसइई) सञ्चालन तथा व्यवस्थापनलाई अझ प्रभावकारी बनाउने उद्देश्यले पोखरामा दुईदिने कार्यशाला सुरु गरिएको छ। गण्डकी प्रदेश सरकारको सामाजिक विकास, युवा तथा खेलकुद मन्त्रालयअन्तर्गत शिक्षा विकास महाशाखाको आयोजनामा उक्त कार्यशाला सञ्चालन गरिएको हो। कार्यशालामा शिक्षा क्षेत्रसँग सम्बन्धित विभिन्न सरोकारवाला निकायका प्रतिनिधि, शिक्षक, परीक्षा व्यवस्थापनमा संलग्न प्रतिनिधि तथा सम्बन्धित निकायका अधिकारीहरूको सहभागिता रहेको छ।
कार्यशालाबाट तयार हुने प्रतिवेदनका आधारमा गण्डकी प्रदेश सरकारले शिक्षामा आफ्नो अधिकारअनुसार आवश्यक कदम चाल्ने र केही विषयमा केन्द्र सरकारलाई सिफारिस गरिने शिक्षा विकास महाशाखाका प्रमुख दामोदर सुवेदीले जानकारी दिनुभयो। विद्यार्थीको रजिस्टेसनदेखि प्रमाणपत्र प्राप्त गर्ने समयसम्म देखिने विभिन्न समस्यालाई सम्बोधन गर्ने गरी नीति तथा व्यवस्थापनमा सुधार गर्नुपर्ने आवश्यकता रहेको उहाँले औँल्याउनुभयो।
कार्यशालालाई सम्बोधन गर्दै गण्डकी प्रदेशका सामाजिक विकास, युवा तथा खेलकुद मन्त्री विन्दुकुमार थापाले एसइई जस्तो महत्वपूर्ण राष्ट्रिय परीक्षालाई व्यवस्थित, पारदर्शी र प्रभावकारी ढङ्गले सञ्चालन गर्नुपर्नेमा जोड दिनुभयो। परीक्षा व्यवस्थापनमा संलग्न सरोकारवालाबीच अनुभव आदानप्रदान, समस्या पहिचान तथा समाधानका उपायबारे कार्यशालामा गहन छलफल हुने उहाँले विश्वास व्यक्त गर्नुभयो।
उहाँले शिक्षा क्षेत्रको गुणस्तर अभिवृद्धि गर्दै विद्यार्थीमैत्री र व्यवस्थित परीक्षा प्रणाली विकास गर्नु प्रदेश सरकारको प्राथमिकतामा रहेको उल्लेख गर्नुभयो। शिक्षाको गुणस्तर सुधार गर्दै परीक्षा प्रणालीलाई थप व्यवस्थित बनाउन प्रदेश सरकार प्रतिबद्ध रहेको उहाँको भनाइ थियो।
राष्ट्रिय परीक्षा बोर्डका पूर्वअध्यक्ष डा. महाश्रम शर्माले शिक्षाका क्षेत्रमा गण्डकी प्रदेशले आफ्नो अधिकारअनुसार प्रभावकारी काम गरिरहेको बताउनुभयो। सूचना, सञ्चार तथा प्रविधिमा आएको परिवर्तनलाई आत्मसात गर्दै परीक्षा प्रणालीलाई अझ व्यवस्थित र अन्तरराष्ट्रियस्तरको बनाउन निरन्तर प्रयास गर्नुपर्ने उहाँले बताउनुभयो। पारदर्शी, व्यावहारिक र व्यवस्थित व्यवस्थापनबाट परीक्षा प्रणालीमा सुधार ल्याउन सकिने उहाँको धारणा थियो।
यसैगरी, राष्ट्रिय परीक्षा बोर्ड गण्डकी प्रदेश कार्यालयका प्रमुख सुभाष पन्तले एसइई परीक्षालाई प्रविधिमैत्री ढङ्गले व्यवस्थित गर्नतर्फ विशेष ध्यान दिनुपर्ने आवश्यकता औँल्याउनुभयो।
