काठमाडौँ,
नेपाल आयल निगमले पेट्रोलियम पदार्थको मूल्य पुनः वृद्धि गरेको छ। अन्तर्राष्ट्रिय बजारमा भइरहेको मूल्य उतारचढावलाई कारण देखाउँदै निगमले आजदेखि लागू हुनेगरी पेट्रोल, डिजेल, मट्टितेल, एलपी ग्यास र हवाई इन्धनको मूल्य बढाएको हो।
निगम सञ्चालक समितिको निर्णयअनुसार पेट्रोलमा प्रतिलिटर रु १७ वृद्धि गरिएको छ भने डिजेल र मट्टितेलमा प्रतिलिटर रु २५–२५ का दरले मूल्य बढाइएको छ। त्यसैगरी, खाना पकाउने एलपी ग्यासको मूल्य प्रतिसिलिन्डर रु १०० ले वृद्धि गरिएको छ। हवाई इन्धन (आन्तरिक)तर्फ प्रतिलिटर रु ६ बढाइएको निगमले जनाएको छ।
नयाँ मूल्यसूचीअनुसार काठमाडौँ उपत्यकामा पेट्रोलको मूल्य प्रतिलिटर रु २१९ पुगेको छ। डिजेल र मट्टितेलको मूल्य प्रतिलिटर रु २०७ कायम भएको छ भने एलपी ग्यास प्रतिसिलिन्डर रु २,०१० पुगेको छ। यस्तै, हवाई इन्धन (आन्तरिक)को मूल्य प्रतिलिटर रु २५७ निर्धारण गरिएको छ।
सरकारले भन्सार महसुल र पूर्वाधार विकास करमा ५० प्रतिशत छुट दिए पनि घाटा न्यूनीकरण हुन नसकेपछि मूल्य समायोजन गर्नुपरेको निगमको दाबी छ। निगमका अनुसार हालको मूल्यवृद्धिपछि पनि संस्थालाई पाक्षिक रूपमा करिब रु ७ अर्ब ८१ करोड घाटा हुने अनुमान गरिएको छ।
