फ्रान्स,
फ्रान्सले आफ्नो आणविक हतियार भण्डार वृद्धि गर्दै यसलाई अन्य युरोपेली देशसम्म पनि लागू गर्ने निर्णय गरेको छ। राष्ट्रपति एमानुएल म्याक्रोनले ब्रेट्सको आइले लोंग बेसमा एक आणविक पनडुब्बीको अगाडि सैन्य अधिकृतहरूलाई सम्बोधन गर्दै बदलिँदो रणनीतिक वातावरणलाई ध्यानमा राखेर यस नीति परिवर्तनको घोषणा गर्नुभयो। उहाँले आगामी ५० वर्षलाई "आणविक हतियारको युग" हुने बताउनुभयो।
उहाँले फ्रान्सका वर्तमान लगभग ३०० आणविक वारहेडहरूलाई बढाउने र २०३६ मा नयाँ आणविक-सञ्चालित पनडुब्बी “दि इन्भिन्सिबल” सञ्चालनमा ल्याउने योजना रहेको जानकारी दिनुभयो। साथै आठ युरोपेली देशहरू – युके, जर्मनी, पोल्याण्ड, नेदरल्याण्ड, बेल्जियम, ग्रीस, स्वीडेन र डेनमार्क – ले नयाँ "उन्नत प्रतिरोधक क्षमता" रणनीतिमा सहभागी हुने सहमति जनाएका छन्।
फ्रान्सका साझेदार देशहरूले फ्रान्सको हवाई-सञ्चालित आणविक क्षमताका अभ्यासमा सहभागी हुन र फ्रान्सका आणविक बमबारी विमान राख्न एयर बेसहरू उपलब्ध गराउन सक्छन्। यसले फ्रान्सको रणनीतिक एयर फोर्सलाई युरोपभर फैलाएर संभावित प्रतिस्पर्धीहरूको गणना कठिन बनाउन मद्दत पुर्याउनेछ।
फ्रान्सको नयाँ आणविक रणनीतिमा अन्तरिक्ष-आधारित चेतावनी प्रणाली, हवाई रक्षा प्रणाली र लामो-दूरी मिसाइल विकासमा साझेदार देशहरूको सहभागिता हुने छ। राष्ट्रपति म्याक्रोनले भने, "यदि कुनै प्रतिस्पर्धीले फ्रान्समाथि आक्रमण गर्ने साहस गर्छ भने त्यसको मूल्य असहनीय हुनेछ।" यो नीति १९६० पछि फ्रान्सको रणनीतिक सोचमा सबैभन्दा महत्वपूर्ण परिवर्तन मानिएको छ।
फ्रान्स र जर्मनीले पनि संयुक्त रूपमा आणविक प्रतिरोधक क्षमता क्षेत्रमा नजिकको सहयोग गर्ने योजना घोषणा गरेका छन्। यस सहयोगले नेटो को आणविक प्रतिरोधक क्षमतालाई पूरक बनाउने तर प्रतिस्थापन गर्ने उद्देश्य नभएको दुवै देशले स्पष्ट पारेका छन्।
